يالعين جاك الليل

يالعين جاك الليل .. وسيلى على غالى قريب ايشيل . وخذى غايتك.
بلا توصاى .. انريدك اتسيلى يالعين امعاى
ما ايجيك من شورى ولا نهاى .. الا قول زيدى والطمى بالحيل
وقولى عزيز وقرعتى ومناى .. خذينا على قربا نوى الرحيل
ونا زاد خلينى على مطراى .. وانقول يا بعيد الدار يالعزيل
اللى وين ما نزعل ايجى رضاى .. بروحه بروحه ما ايعوز رسيل
ما زلت فى قولى وله وفاى .. وحق من قهر قوة اصحاب الفيل
واقف ابثقلى ما انحس اعداى .. وساع ينظروا منى امرار الويل
انجيهم ونا عابى ابكل اعباى .. خبير فى المعارك ماانهاب ثقيل
واخذ على قولة تعالى جاى .. متوكل على مولاى هو الوكيل
واتجى عيلتى جملة بلا تبطاى .. امعاى يفزعوا ديمة بلا تعطيل
وانردوا اللى عدت بشوق غلاى .. ابقوة اسلاح وجيدات الخيل
واللى فيه داير خير مو نساى .. اردود السلف ديمة اكفا وجميل
واللى صاحبى ديمة وعارف داى .. وعندا على ميعاد صوب خليل
انريدا ايشاركنى بلا توراى .. وعارف كلامى ما عليه ايخيل
واللى عمر ما جرب ومو غواى .. ايقول ساهلة هابا عليك هبيل
ابناره كوانى ما الها طفاى .. ابها ضرنى لانى جهد لاحيل
رجيتا وما جابا عزيز رجاى .. وتمت الناس امغير قال اوقيل
جرينا وماساعدالله اخطاى .. وتما ايباعد بينا الدليل
دعينا وما حقق الله ادعاى .. وعندا احكامه خافيه الجليل
اخسارة اليوم امعاه ضاع شقاى .. انسينى وخلانى ودار بديل
ما احسبت ياغالى اتعيش بلاى .. وفى دار غيرى تشعله قنديل
حتى وانت بعيالك ونا بضناى .. خلينى انشوفك ما اتكون بخيل
وين ما اتعدى قبل دير عزاى .. ميت ونا ميت بلا تغسيل