أغانى الرحى الليبية القديمة

والنجع لولا كْباره ما ينقدع فيه عايب


ما كيف خيلهم خيل ديما عَلَفهن بزايد
أصايل سْماح الصهيل يْجَلّن عليك الغدايد


ما يقعدن غير لصيات شينات والا ملاحي
لا سبد من قولهم مات أما امراض والاّ جْراحي


نا كْبرت واحداب ظهري وعيني صوتها ضبابة
وزْعَمَة راه وين قبري وفي أي قبلة ترابه


أين نهار مبروك واين ليلة سعيدة
يجيني خويا نلاقيه وايدي تسلم علي ايده


يا سعدنا يا بناويت احنا عندنا من يجينا
خونا نظيف السراويل يشق النواجع علينا


الغالي قمر، والقمر فوق واولاد سيده نجومه
ونا خوي سيف المحلة واعر علي من يسومه


يا خوي كانك وخيي انت الراي وانا الدبارة
وان كنت خي النساوين راهو غلايا خسارة


يا مينتي يا الحنة ما اغلى عليا جوارك
يبقى فلان يدودش ما بين داري ودارك


القزون ما زال قزون والدمع مالي جفونه
يذوح بين الحواشين ويقول وين الحنونة


لا لام كيفها حد ولا لخت كيف الدماية
تمرض لا طال مرضي وتبرا لا زال دايا


يا زينها ما تذرّي تداري ريح العجاجي
في سيدها ما تعطل ناوي طريق الحجاجي


ان شا الله يا بوابير تنـزلن بو جريدي
بو عيون كيف القرابيل بو فم كيف المجيدي


يا من شبحهم رجاجيل في السانية اللي عريضة
اللي حبيب فرح لي واللي عدو جا بغيضه


مهبول من يزرع الفول في فم باب المدينة
ومهبول من ياخذ القول في صاحبه نور عينه


في القايلة ما يقيّل وفي الليل نومه فزايز
صابح سبيبه مهيّل وشارب الريح فايز

*****************************
الصبر عند العرب مر وعند العوارف شجاعة
اشريه يا زايد العقل لو كان صاحبه بيش باعه


ودك من العقل قنطار وم الزين حتى وقية
وْودّك إن جاورك جار عليه ما تْطَلّع السَّيَّة


اخّيه ما مَرّ ريقي واحّيه ما حَرّ دايا
واللي حْسبته حبيبي ظهر عدو من ورايا


يا سعد من قال أمي ومن بيتها واجباته
ثاريتك يالم جنة يا تعس من فارقاته


يا حارث الشوك من تو تشوف العجب من دراسك
ويا حافر حفرة السَّوّ ما تحفر إلا مقاسك


حاذي المساعيد تسعد حتى بْمَشْيَك مْعاهم
وان كان حاذيت لنذال يغبى صوابك حْذاهم


يا صاحبي نْوَصّيك حاجتين راه يقرضنك
مواطاة عينك مع الضيف وخيل العْدا كان جَنّك


يا ريتني طير ونطير وجناحي ع الأرض هافي
نجي لحوشكم يا غوالي نميعد ونقلع رْيافي


يا سعد من غايبه جاه ويا فرحته يا دلاله
ونا غايبي طال مرجاه مشتاقة لتوقة خياله


شيناه يا قلة المال ودين الرجال الشحايح
يْواطي الباهي العصران وشيبه بلا كبر لايح


اجعل كل ممدود مردود واجعل كل عوجا سقيمه
واجعل خطورهم أولافي مْعَ هَبّ لَرياح ديما

*********************************
يادار عنك رحلنا وعنك غدينا وزايع
و يادار أحكى خبرنا على اللى مليح الطبايع

يا اميمتى جيت للدار و حاكيتها من هبالى
ألقيت الوطاء و موقد النار و ميعاد الاحباب خالى

أنا يالغالى انريدك....كبير عقل و انت العارف
تنهى سفيهك على العيب و أتحمل اللى جاك ذارف


أنا يالغالى أنوصيك دير المليحة ودارى
واللى أنكتب على الجبين ماعاد يمحاه قارى

لو كان لاقاك فى صبح الايام بالخير جاتك
وان لاقاك شين فى صبح...ولى على تالياتك

الصبر هو طب الاوجاع و الصمت يقهر الاعادى
و اللى ترك باب الاطماع أتحبه جميع العبادى


البخت ماهوش بالسيف و لاهو بكبر الجهامة
و لاصايبة نقصت زاد...ولا صبر بعده ندامه

أنا هلى زينين زينين...ومايفعلوا غير زينة
أهل الصلاوات و الدين...وحق ربهم عاطيينه

ايفرج على كل مكروب اللى حالته كيف حالى
و ايفرج على نور عينى بجاه مولى الموالى

يا خاطرى كون جبار و الموجعة نقسموها
يما انعيشوا بالاقدار...و الا العباد نتركوها

*******************************
أنا العين وانتم نظرها و أنا اليد وأنتم صوابع
ونا الارض و أنتم مطرها كان غبتوا تصيف المرابع


نحساب روحى نسيته ماعاد يخطر عليا
جرحى أنقض وين ريته بعد الجفا يا أوخية


يا عين يا منع السو شكى خاطرى من هبالك
تبى الربيع نوار فى الصيف ما أكبر هبالك

ياربنا تكتب اللم كيف ما كتبت الفراقى
لين تقربى يا وديدة تجينى من غير شاقى

يا عين شورك انسيتيه اللى قبل كان غالى
فوق الرحى ماطريتيه اليوم وأمس مانكش زينة