يا العين هيا شوره ..الشاعر أرويعي الفاخري

يا العين هيا شوره .. العقل حاس وأختلطن عليه اموره..مشكاي قالك

يا العين أنريد انعدّي ..العقل قالك غاية مناي او ودّي

متضايق ملاجي نين واصل حدي .. ما اهناك وين الريح تاخذ دوره

ما أهناك شي حاجه السر اتهدّي .. قول خاطري هالوقت فيت انظوره

أنجيه من خبر واجد و نا متكدّي .. و ثقل الجضر لاصق عليّ بزوره

إيخف وينما يده أتجي في يدّي .. و إيجلّي غشاواتي بفوح عطوره

ولساني الشاعث في اللهاه إيندّي .. و حلو الخبر يسهل عليه مروره

وبين ديه نضحك ضحكتي من جدّي .. و عنده جرب كبدي اتطيح قشوره

في عينه الريح معاي و الاّ ضدي .. نقراهن اقرا برّاج في بلوره

ويا العين لاعد م الطريق اتردي.. ماهن سوا رقو الجبل و احدوره

يا العين كيف الدوّه .. اللي ما مشيتي قاعده لا توا

عندي العقل مدكمس و حايس جوه .. واسق سماه و ضايقات أحبور

متحيّن علي بارق يفقس نوّا .. إيخلّي هوادين البراقي عوره

أخذيه نين كنيبه ابهاإيترا. شوفت اللي حالق عليه أخطوره

حتى من بعيد لبوجبين اضوّا..ايسد النظر للطير كيف نقوره

قدّامك علي نار الغلا يطوّا.. و ليل ونهار أمسمرك بسموره

يروف نين من حاله عليه عدوّه.. اللي كل ساعه كاترات شروره

وربيع الرجا يا ريت ياخذ سوا..علي ما جراله ما طرب لخضوره

يا العين راحي بينا .. و خفي علي لولاف لا تبطينا

ما أهناك شي عاقل يلوم علينا .. ان قلنا الجوله على اعزاز ضروره

كلام العرب بلحيل ما يعنينا.. تعتم يقول لها العين فجوره

انواروا اللوعه ما نهار نوينا.. قويه اتفنّص عينها مقروره

سوا عاد زينه كان و الاّ شينه .. أترفرف علي حبل العلل منشوره

ما يقول وين اللي الشمس بعينه .. و زومة الرعد في الغيم مي مستوره

حتى و الزمان ديار نازل فينا.. و عنده دمانا في الغلا مهدوره

ألاّنا و هي ع الصوب ما وانينا.. العين فيه بالضلعه اتجي مجروره

وهي كل يوم تقول يا ناسينا.. و كل دار فيها طالقه اثغبوره

يا العين علمي ضايق .. ودوج العرب يالاي ماني طايق

يقولك اللي مو من حساب عتايق ..الايام ع العدام امجبرات كسوره

أوحل في الزمان و دين هالخلايق .. اللي كل ساعه جايين بصوره

صغار النفوس اللي خياهم تايق .. ما يطعموا مسكين يوم عاشوره

أن قالوا كلام إيزيّفوا الحقايق ..و أصواتهم علي درب الظلال جهوره

واللي تمتسك منهم عليه سرايق.. فيهم ترفرف رايته منصوره

وهو دوم عالنهبه زناده سايق.. و ما أتفت منه غفل لا معقوره

والطيب إيلاقي في الطريق عوايق .. منهم و ديمه زلته منظوره

أن قصّر ألسنتم عليه طلايق .. و لا أن دار زينه عندهم مذكوره

وقول الحقيقه تم موعد لايق .. منّه عرب كيف الصيود نفوره

عندي العقل يدوي ما لوالي فايق .. و ان طوّل اسماه اللي خرج عن طوره

وبالك الا لا خير في اللي رايق .. بلا نار حمره ما تفوح بخوره

يا العين شور الغالي .. أخذي العقل كنيبه أسع يصفالي

علي شان كثرت هالدروب أقبالي ..إيغيّب عليّ و نا نريد حضوره

أبقيت لطرا الايام كي التسالي .. بينهن تقول إيطاوحن في كوره

ونا قبل كنت يكيد روز اثقالي .. فيهن و ديمه صابتي موفوره

ولا إيغرّبي فيهن بكا القبالي.. و شيل السراب و طرشقت لمهوره

وألتوّا يوازي في الخبر غربالي .. كلامي قليل و سيتي محجوره

ولا انعيب في عمي ولا في خالي .. ولا صاحبي نجرح نهار شعوره

امغير ما اقدرت اني انوسع بالي .. ان كبّرت السيه فيّ مي مغفوره

ولا اقدرت نشبه بالتحيل افعالي ..اللي بحيط لمحادف اتطيح تموره

الا يالعين عزيز موكي والي.. ومهما يدير نقول زينك دوره

يا العين هيا شوره .. العقل حاس وأختلطن عليه اموره..مشكاي قالك

صح لسان الشاعر ،، وصح راسك يا الغالية على النقل الموفق
تحيـــــــــــــــــاتي

يا له من ظلم صارخ اجتاح تللك (العين ) المسكينه يريدون منها حالا التوجه لمعاينة حالة العقل وهو في حجرة العناية الفائقة وقد اجمع الاطباء على موته سريريا وهي لم تألو جهدا في وضع شكاير التغذية وضبط معدلات النبض وماذا اذا كانت من العيون الضيقة فلبينية اوتالاندية اوصينية ذات البعد البؤري لا يجتاز قامتها القصيرة في حين ان العقل الجاثم على السرير اطول منها كثيرا ومن هنا ليس في مقدورها إلا إحالة العقل الى الطبيب الزائر الذي يدعى ( الياس ) الذي قام بدوره برفع يديه الى السماء طالبا جنات تجري من تحتها الانهار لاخينا العقل وان يلهم اهله وذويه جميل الصبر والسلوان ا

هرقل كتب:: يا له من ظلم صارخ اجتاح تللك (العين ) المسكينه يريدون منها حالا التوجه لمعاينة حالة العقل وهو في حجرة العناية الفائقة وقد اجمع الاطباء على موته سريريا وهي لم تألو جهدا في وضع شكاير التغذية وضبط معدلات النبض وماذا اذا كانت من العيون الضيقة فلبينية اوتالاندية اوصينية ذات البعد البؤري لا يجتاز قامتها القصيرة في حين ان العقل الجاثم على السرير اطول منها كثيرا ومن هنا ليس في مقدورها إلا إحالة العقل الى الطبيب الزائر الذي يدعى ( الياس ) الذي قام بدوره برفع يديه الى السماء طالبا جنات تجري من تحتها الانهار لاخينا العقل وان يلهم اهله وذويه جميل الصبر والسلوان ا

تعليق مميز كتميزردودك

يسلموووووووو

» بين الشاعر والقمر
» الشاعر و العصفور
» العين باكيه
» حوار مع العين
» لك حصرية ... الشاعر نعيم الزوي