الكنافة بالقشطه او الكريمه

المقادير
نص كيلوا كنافه شعر ناعمه
كوب ونص سمن او زبده (أنا عن نفسي باحب احط سمنه بلدي لكن باحط جزء من الكوبايتين زيت دره عشان ما تتحروقش السمنه )
ربع كوب سكر بدره
وللحشو
كوبايتين كريم باتسيير او كاستر او مهلبيه عاديه او ممكن نعملها بمكسرات مهروسه ومضاف عليها سكر خفيف وجوز هند وزبيب وكده يعنى
وكوبايتين شربات او شيره (الشربات معروفه يعنى كوباتين سكر وكوبايتين ميه ولمونه على النار لحد ما يتقل )
بس الكنافه لازم الشربات يكون تقيل شويه
الطريقه
اول حاجه بنجيب الكنافه ونقطعها حتت صغيره اوي
انا عشان تتفرم سهل اوي بابيتها فى الفريزر وبعدين افركها وهى متجمده
بتكون اسهل وتطلع مفرومه اكتر
بعد كده بنرش عليها السكر البودره ونقلبه فيها كويس وبعد كده بنكون حطينا السمن على النار تسخن شويه مش اوي اوي
وبعدين نرشها على الكنافه ونوزعها كويس ونفرك الكنافه بادينا وطبعا ممكن الكنافه تاخد سمن اكتر من كده ونعرف منين انها استكفت سمن
لما ناخد حبه في ادينا ونضغط عليها بادينا لو طلعت سمن تبقى تمام

ولما نفتح ادينا نلاقيها اشتكلت كده على بعضها كده تبقى السمن تمام لو ما عملتش كده نبقى زود ربع كوبايه سمن كمان



بعد كده ناخد نص الكنافه وفردها فى صنيه ونضغط عليها جامد اوي ويستحسن بعد ما نوزعها نضغط عليها بصنيه تانيه مقاسها اصغر من صنية الكنافه
وبعد كده نفرد عليها الحشو
لو كان كريمه زي كده

او مكسرات او حشو مشكله

بعد كده بنجيب باقي الكنافه ونفردها على وش الصنيه بالراااااااحه اوي خصوصا لو كان الحشو كريمه ونوزعها كويس بحيث نخطي الحشو كويس اوي
وبعد كده نضغط عليه بالرااااااااحه اوي لو كانت الحشوه كريمه او حاجه طريه
ولو كنت مكسرات نضغط اوي بقى مش مشكله ونظغط على الجوانب كويس عشان تقفل على الحشو
ونجيب الصنيه الاصغر منها
ونضغط بها بالراحه برضه للكريمه وجامد للتانيه ونساوي بها وش الصنيه كويس اوي وبعدين نسيبها فوقيها ويا ريت كمان نحط فى الصنيه حاجه تقيله شويه كيس سكر كيلو مثلا لمده خمس دقايق كده


بعد كده التسويه بقى طبعا احناعايزنها تطلع من فوق زي من تحت
فى طريقتين يا فندم
الاول انك تسويها لحد لما تحمر من تحت وبعدين تقلبيها فى صنيه تانيه قدها بالتام وممكن تقلبيها الاول على حاجه مسطحه وبعدين تزحلقيها كده فى نفس الصنيه بتاعتها ودي طريقه احسن عشان بتطلع حمرا ومساويه من فوق ومن تحت والمشكله ان الحكايه دي بتبقى صعبه شويه فى الكريمه بالذات
والطريقه التانيه بقى انك تحطي على وشها من فوق الصنيه الىكنا بنساوي بها الوش وتسبيها معاها فى الفرن كده وهى هاتحمر الوش برضه بس مش هايبقى نفس الدرجه بتاعة تحت يعنى
المهم بعد ما تطلع احنا نسقيها الشربات الى عملنا قبل كده وبرد

ودي الكنافه بالقشطه

اه وبالمناسبه بالش فزلكه زياده من حضاراتكم
السكر البودره ما تلغيهوش وتقولي ماهو فى شربات لان السكر البودره هو الى بيخلي الكنافه تمسك فى بعضها
وكمان الشربات لازم يكون تقيل عشان برضه تمسك فى بعضها
والسمنه لو كانت قليل هاتطلع الكنافه ناشفه ومش لونها احمر وحلو
اه وعلى فكره فى كنافه فى السوبر ماركت بتكون مفرومه ومفروكه بالسمن احيانا كمان لكن انا باحب اجيب الطازه من المخبز راسا الينا
لكن طبعا المجمده تمشي برضه ما تقولش لا
بس خلي بالك لو كانت مفروكه بالسمن ابقى حطي سمن قليل بقى يعنى نص الكميه ولا حاجه
والشربات لوخفيف الكنافه هاتطلع طريه وبايشه ومش مقرمشه
واي اسأله يا ستاتيت يا حلوين او يا رجاله برضه انا تحت امركم
والى يجرب يقووووووووولي

اني جربتها وكذا مره واحسن ملي في المحلات جاهزة
:0013:

شكرا اخي صوان على متابعتك الدائمه
:1121: :33zz: